تغيير شعب باكمله

تغيير شعب باكمله

انا حسبتها لقيتها مسألة غريبة سواء من الناحية النظرية او العملية..هو التغيير فى سلوك وتفكير الفرد شئ سهل ولا ده شئ طبيعى فى الانسان بمعنى هل إكتساب سلوك جديد وطريقة تفكير وأسلوب معيشى معين شئ ممكن على مستوى الفرد والمجتمع؟؟؟؟ إذا كان مستحيل معانا اقصد جيلنا احنا يبقى الحل فى ألأجيال القادمة فعلآ لكن بتفضل المشكلة هى هى لأن لازم التغيير يسرى علينا أولآ علشان يسرى على الأجيال اللى جاية ورانا..وإلا إزاى أقول لأولادى فى المستقبل متخافوش وخدوا حقكم طالما معاكم الحق وأنا شخصيآ مفتقدة القدرة على تفيذ اللى بأقوله؟ بالظبط لما تلاقى اب بيقول لأبنه التدخين مضر وغلط وحرام والسيجارة فى ايده!!! ولو قلنا تغيير أنا أعتقد إن تغيير أى شئ ممكن لكن تغيير السلوك العام..شئ صعب لكن مش مستحيل..أعتقد إن تغيير السلوك العام والخاص لازم يكون بناء على خوف... بمعنى إن الانسان يكون مجبر على إتخاذ سلوك معين بالقوة أو الخسارة.. وده فى رأيى نجاحه مضمون لحد كبير ....فيه كلمة قريتها بتقول إن سلوك الناس فى مترو ألأنفاق تحت ألأرض مختلف تمامآ فوق ألأرض مع إن إلأنسان واحد..لكن ايه الفرق؟؟؟ الغرامة او الخوف من الخسارة لو إتطبقت فوق ألأرض زى تحت ألأرض إتحلت المشكلة بنسبة كبيرة... انا اعتقد ان اهم اسباب تطبيق القانون فى أمريكا وأوروربا ليست نابعة من حب القانون ذاته لكن من الخوف من نتيجة تطبيقه أسباب إحترام النظم والقوانين على الفرد بمعنى الخوف من دفع 100 دولار غرامة كسر إشارة المرور يمنعنى من اني اعمل كده وهكذا وهكذا لغاية ما يتحول إحساسى الداخلى ويتغير من مجرد شعور غريزى بخوف من القانون إلى شعور آخر يسمى إحترام القانون وهو ما نجحت فيه انجلترا مثلآ من وجود أجناس وشعوب وثقافات مختلفة ومتباينة إلى شعور واحد فقط يجمع الكل فى البداية وبعد كده اكيد حيحصل التغيير لهم لأن إحترام النظام ممكن يختلف معناه وتطبيقه من شعب للتاني لكن الخوف واحد عند الكل ولا ايه رأيكم

jano 8/11/2003

مصر التى فى جيبى وفى فمى

مصر التى فى جيبى وفى فمى

اخطف واجرى وكله بينهش ويهبش وحاميها حراميها كلمات للآسف بقت على لسانا كلنا او على لسان معظم الناس وشكلها كده حتكون أمثلة وحكم المستقبل لازم نشدد القانون يااخوانا حبتين قبل ما نروح فى أبو نكلة وتخرب البلد فيه ناس كتير كلهم سرقوا والمصريين الشرفاء بيتفرجوا ومتمسكين بالمبادئ طب وبعدين هانفضل ساكتين لحد ما يخربوها ويقعدوا على تلها ولا نتحرك بسرعة ونعالج الخلل ده و الخلل ده اصلا جاى منين من البيت ولا المدرسة ولا القوانين اللى مش بتطبق من امتى السارق يتباهى بالسرقة انا النهاردة سمعت حديث غريب قوى ولاقيت واحد بيقول لزميله عارف يا واد ياسمكة البتاعة اللى معاية دى سرقتها منين .. من الحتة الفولانية أنا مش عارفة احنا فين بالظبط يكونش جينا فى الزمن الغلط والا نزلنا من المريخ فيه كتير مازال مصريين شرفاء وقلة لصوص بس القلة دول ابتدوا يزيدو ويتوحشوا وبقى ليهم أنياب ولسة الدنيا بخير زى موظف المتحف الى رفض الملايين وغيره وغيره بس عاوزين تصرف سريع لاستئصال الفساد قبل مايزيد أكترواكتر طب سيب حتى قلم جاف بنكلة على مكتب فى أى شركة أو مصلحة حكومية لمدة خمس دقايق .. أتحداك لو لقيته الشعوب كلها فيها حرامية وشرفاء ومنهم مصر بس القانون عندنا طرى حبتين وكمان نايم وفيه تسيب واللى معاه فلوس بيطلع لسانه للقانون وبيخرج زى الشعرة م العجين والمحامين بيخلقلوا عشرين ثغرة فى القانون طبعا مع تقديمى للأسف للمحاميين يا اخوانا والله احنا كنا أحسن ناس فى الأرض وده مش كلام انشا ولا جرايد واسألو أبهاتنا وجدودنا ودى حاجات دخيلة علينا ومكناش كدة أبدا كنت تلاقى الراجل راجل مايرجعش فى كلمته لو حايخسر رقبته وكان أمانة الدنيا كلها فيه والدهب فى ايده يزيد ولا ينقص فين راحت أخلاقنا وقيمنا الجميلة دى مش لازم نعمل وقفة ومراجعة مع للنفس صدقونى احنا شعب طيب ونبدأ نشدد القانون ومانفرقش فى العقوبة بين المال العام والخاص دى كلها سرقة وكله مال والا هانكون بنقول للحرامى اسرق بس بعيد عن الحكومة طب ماهو اللى هايسرق حتى من أبوه هايسرق بنك الحكومة ولا نغير الأناشيد الوطنية ونقول ... مصر التى فى جيبى وفى فمى أو يا أحلى هبرة فى الوجود .... يا مصر و يا أشهى البلاد يابلادى ... يا هبرتى يا مصر أما الغلابة فلهم النشيد الوطنى وهو ... فولى أحببتك يافولى حبا فى العدس وفى الفولى مش كدة والا ايه

jano 8/11/2003

الوطنجية ... الأونطجية ...

الوطنجية ... الأونطجية ...

اكيد ان كلنا بنحب وطننا مصر .. صحيح بدرجات مختلفة .. و بمقدار يتغير بتغيرالسن وبمقدار قربنا او بعدنا عن الوطن ده ... و كمان طرق تعبيرنا عن الحب ده بتختلف... و اكيد ان ارقى انواع التعبير عن الحب ده خدمة البلد بالعمل على مصلحتها مش بالكلام حـتى ولو ما قلتش ولا مرة فى حياتك قد ايه انت بتحب مصر... فى نظرى الناس اللى فعلا بيحبوا البلد دى هما الناس اللى بتشتغل فى هدوء من غير هليلة ولا مزيكة حسب الله وبيشتغلوا باخلاص من غير مقابل ساعات بس لمجرد انهم بيحبوا بلدهم دول هما الناس الوطنيين الحقيقيين اللى ما بقوش موجودين كتير اليومين دول.وفيه نوع تانى من المواطنين ... إذا تكلموا عن مصر تلاقى عينيهم اتملت دموع وتعبيرات غريبة جدا ظهرت على وشهم .. و دخلوا في حالة من الهيستيريا فى الكلام عن مصر و عن حبهم لها .. و عن إستعدادهم للتضحية بكل غالي ورخيص فى سبيلها.. دول بقى لو دورت وراهم تلاقيهم من اهم اسباب الهدم فى البلد .. و سبب مباشرفي الضياع اللى عايش فيه بعض اولاد مصر والغريب ان النوعية الاخيرة دى اكترهم من الشخصيات العامة .. سواء سياسيين أو فنانين أو رياضيين أو حتى مثقفين من صحفيين و رجال أحزاب ... و لهم مواسم زى مواسم الفاكهة والخضار كده .. يطلعوا فيها على شاشة التلفزيونعلشان يعيدوا ويزيدوا ويلتوا ويعجنوا كل اللى قالوه اللى السنة اللى فاتت واللى قبلها من قصائد حب في مصر .. وبعدين يروحوا مع الوبا بتاع هنادى فى فيلم دعاء الكروان ودول تعرفهم لما يبتدوا يتشنجوا وصوتهم يعلا وهما بيتكلموا عن مصر ويمكن يلطموا ويصرخوا لو سمعوا أن كلمة اتقالت في حق مصر .. ما تاخدش منهم الا الكلام والانفعال من اول احنا شعب " السبعتلاف سنة حضارة " ... لحد " مصر أم الدنيا " ... وعلى طول كده شعارات فى شعارت .. و بعدها كل واحد ياخد الفاس بتاعه ويبتدى يمارس هواية الهدم في أساس البلد و الدموع نازلة ترف من عينيه علشان تقع على ايد الفاس اللى فى ايده وهـو بـيقول ... كله في حبك يا مصر ... و إذا كان النوع الأول من المواطنين بنسميهم الوطنيـيـن ... فإن النوع التاني انا باسميهم " الوطنجية "... علشان اميزهم عن الناس الاصيلة اللى بتحب مصر بجد اللى هم الوطنيين الحقيقيين .. و لأن تعبير وطنجية عامل هارموني مـع كلمة " أونطجية" ... وكمان علشان أن كلمة وطنجية بتعرفنا انهم اخدوا الوطنية مهنة .. يحققوا منها أرباح و لو كان ده على حساب خسارة الوطن كله ..و للأسف .. احنا شعب عاطفي .. ننخدع بكلمة فما بلك بدمعة .. و لأننا عاطفيـين فاحنا بـنصدق " الأونطجية " وفي نفس الوقت نكذب الوطنيين الحقيقيين لأنهم ما بيعرفوش كويس فى فن الكلام ... متهيألى كل واحد فينا لازم يبتدى يحاسب نفسه حساب عسير ويـقول ... انا قدمت ايه لبلدى غير الكلام ولا ايه

jano 8/11/2003

EGYPT 2010

EGYPT 2010

اخوانى الاعزاء موضوع خطر ببالى قلت نتشارك بالراى فيه مش عارف ليه فكرت هل احنا فعلا ماهلين اننا ننظم كاس العالم لكرة القدم 2010 فى مصر؟ هل نقدر؟ هل دى حاجة تشرفنا؟ هل عندنا الامكانيات اللى نقدر ننظم بيها حدث بتشوفه الدنيا كلها؟ لو وصلنا انه ايوة هل ممكن نعمل حاجة نساعد بيها؟ ولا لا؟ ارجو الافادة؟

طارق المملوك

8/11/2003

غنوة لمصر

غنوة لمصر

مشكلتنا اننا بنحمل مصر دايما كل اخطائنا وبنحاولش اننا نساعد مصر ونخليها اجمل عروسة فى الكون وبدل ما بنزينها بنحاول ااانا نوسخها ونشيل الزينة من على وشها ..لكن الشاعر .. محمود الجمال قدر يعرف انة السبب واحنا كمان السبب فى اللى انت فية يا مصر ..علشان كدة غنى لمصر وقال غنوة لمصر-------يا مصر قومى وشدى الحيل .. كل اللى تتمنية عندىراح أضوى علشانك قنديل .. يمكن تفوقى وتتسندىقومى يا مصر خلاص الليل .. اللى فى ظلامة كدح زندىأهُة انتهى ولقيت لى سبيل .. أعودد علية واوفى بوعدىيا مصر جيلنا دة أجدع جيل.. مع ان عقلة كدة مصدىلو بس يرضى برزق قليل .. وبدل ما ياخد يدىماكنش حالك كدهة يميل .. وكنتى عن شعبك ترضىلكنى طمعة فاتنى عليل .. ورجعت كفى على خدىيا مصر شعبك داق الويل .. وكلام يجيبة ويودىلكن معدن أصة اصيل .. وقلبة بالايمان مهدىوالحمل مهما يكونن لة تقيل.. وجفنة منة متندىبرضك بقداس وبترتيل .. وبهيلة هيلة راح يشدىيا مصر قومى وشدى الحيل .. انا اللى كان سندىاليوم دة برفض أبقى ذليل .. وفى عزتى عزة بلدىهاتى الحمول خلينى أشيل .. عنك يا أمى ويا أرضىعاهدينى عند ضفاف النيل .. وحطى يدك فى يدى-------------فياريت بدل ما ترموا كل خطاياكم وهمومكم على مصر..شيلوا انتم عنها الهموم والخطايا..وكفاياكم بقى .. وارحموا مصر ..

jano el kady

5/11/2003

مين هى مصر ؟

مين هى مصر، ايه هى مصر

سؤال صغير فى عدد كلماته، لكنه كبير جدا لو حاولنا نجاوب عليه. مين هى مصر؟ هى امى وابويا، هى اختى واخويا، هى صلاتى وعبادتى، هى ماضى وذكرياتى، هى احلامى ومستقبلى. هى ترابى اللى هيوارينى، هى نبعى اللى بيروينى، هى سمايا اللى بتغطينى، هى ارضى اللى بتوكلنى. هى شرفى وعرضى، هى سندى وظهرى، هى بدايتى ونهايتى. مصر هى شعب ونيل ورمل هى حب وحنان وصبر هى صحرا وجبل وبحر هى منجم قلوب من دهب، هى منجم عقول من ماس هى ارض لسة بكر مهما طال الزمن لا يمكن تموت مصر بتقولى مفيش قوميه، بتقولى فيه رشوه وفساد وظلم بتقولى شباب ضايع وهوية تايهة هاقولك لا تعالى معايا واسمعينى شويه معظم مسئولينا صحيح ساعات بيظلموا، او بيقسوا، او حتى بيعندوا وفيه ناس كثيره بتسرق وتهرب، وتاخد وتجرى وفيه كثير مهملين ومرتشين لكن لو جه يوم حد حاول ياخد بس شبر من ارضنا هتلاقى كل الديابة والتعالب بقت اسود متنمرة واقفة زى الجبل بتصد كل غاشم معتدى وبتغرز اظافيرها فى جسم اى مغتصب حتى الحرامى هتلاقيه يجرى يدافع عنها ديه عرضه وشرفه، ديه ستره، ديه كل دنيته هتقولى لى ليه بيعملوا كده؟ هاقولك ده جهل بعيد عنك، محدش فيهم عارف يعنى حب، يعنى ايه احب مصر. محدش عارف ان الظلم والسرقة والنهب، ان الهروب والإهمال والرشوه، ممكن يكونوا بيجرحوا مصر. محدش عارف ان كل ده هو حفر لقبر مصر علمى الناس ازاى تحب مصر، هتلاقيهم بيجروا ويتسابقوا علشان يحققوا حلم مصر بتقولى مفيش قومية، مفيش هويه، والشباب كله ضايع وفاقد الوعى. بصى فى عيون شبابنا وهما فى مظاهراتهم، ضد الظلم والتعدى والإفترا، شوفى الجدعنة فى تصرفاتهم لو بس واحده اتعرضت لأى اذى شوفى الشهامة لو احتجتى لاى حاجة مش معنى ان فيه شباب ضايع يبقى الكل تايه اللى ضايع واللى تايه، ضاعوا علشان فقدوا الحب، فقدوا الإهتمام، تاهوا وسط زحمة الحرب علشان الحياة بتقولى البنات كلها فاقدة ومتسيبة وبارده، فقدوا احترامهم لذاتهم وانوثتهم؟ هاقولك لا مش كلهم، شوفى المحجبات عددهم بيزيد ازاى وفيه كثير محترمات ومش محجبات هاتقولى ليه فيه بينهم كل الفساد هاقولك برضه فقدوا الحب والإهتمام فقدوا القدوة والنور اطفى حواليهم عايشين جوا ظلمة ملهاش حدود توهان فى كل الحدود، يبقى عايزه منهم يكونوا مستقيمين ازاى؟!!!! علمى الناس الحب، هتلاقيهم سويين من غير جهد علميهم ازاى يحبوا نفسهم، طبعا مش قصدى انانية وغرور قصدى ازاى يحترموا نفسهم، ازاى يهتموا بنفسهم، ازاى يحافظوا على نعمة ربهم، "لقد خلقنا الإنسان فى احسن تقويم". لما يتعلموا ازاى يحبوا ربهم، وازاى يحبوا نفسهم هتلاقيهم بيحبوا اهلهم وكل اللى يعرفهم يتمنوا قربهم ساعتها مش هتلاقى اهمال فى زيهم ولا فى شكلهم وهتلاقى تفوق فى عملهم وفى علمهم هتقولى لى الفقر هدهم، والحاجة كسرت انفهم، واضطروا يجروا ورا همهم وينسوا اصلهم؟!!! هاقولك عمر الفقر ما كان مبرر لسرقة ولا رشوة، ولا حتى كان مبرر لانحراف وفساد وروشه هتلاقى الفقير متمسك بدينه واخلاقه، راضى بحاله ومحتاله، حابب قسمته ونصيبه بيحارب علشان يكبر وياخد حقه، ويحقق حلمه، بس عمره فى يوم ما نسى ربه، ودائما فاكره، ولا فى يوم اتنازل عن شرفه. نبينا الحبيب قال كلمة، "الخير فى امتى إلى يوم الدين" علشان كده اوعى تقولى فى يوم ان الشباب كله ضايع ولا تايه الحكاية كلها ان زى ما فيه شباب تايه علشان فاقد الحب فى حياته، فيه زيه بالضبط ويمكن اكثر شباب فاهم وواعى، ولما بييجى اليوم اللى فيه امنا بتتعرض لأى مشكلة كبيره كانت او صغيره، بتلاقى حتى التايه عرف قضيته، ووصل لطريقه، ومشى فيه بدون تردد ولا تفكير. كل الشباب طريقهم واحد التايه والواعى عارف، ان مصر هى كل دنيته ولو فى يوم بس اتهددت بكلمة بتلاقيهم كلهم اتحولوا لوحوش تاكل اى حد بس يقرب من شبر واحد من ترابها. كل الحب والتقدير لكم جميعا

نجلاء محمود

6/11/2003

عودوا الى مصر

عودوا الى مصر

السلام عليكم هذه جزء من أبيات شعر فى عشق مصر لفاروق جويدة بها معانى جميلة وأهداف نبيلة ممكن تقروها بتأنى كده وتفكروا فيها شوية؟ يا عاشق الأرض كيف النيل تهجره لا شىء والله غير النيل يغنينا أعطاك عمرا جميلا عشت تذكره حتى أتى النفط بالدولار يغرينا عودوا إلى مصر غوصوا فى شواطئها فالنيل أولى بنا نعطيه .. يعطينا فكسرة الخبز بالإخلاص تشبعنا وقطرة الماء بالإيمان تروينا عودوا إلى النيل عودوا كى نطهره إن نقتسم خبزه بالعدل .. يكفينا عودوا إلى مصر صدر الأم يعرفنا مهما هجرناه .. فى شوق يلا قينا jano

5/11/2003

الاهمال .. كمان فساد

الاهمال .. كمان فساد ...

اهتمينا قوى بملاحقة السرقات بس وسبنا المهمل واعتبرناه شريف طالما أنه لم يسرق بالرغم أن الاهمال والتقصير قد يكون اخطر على البلد من السرقة والأتنين فيهم خسارة ودمار لمصر وبالاهمال أصبحت كل أعمالنا كلام وفض مجالس وضحك على الدقون وتستهلك فى مؤتمرات وقرارات نظرية خاوية ولا تنفذ من الناحية العملية والتنفيذية فيه حد فيكوا عمره شاف مراقب صحة يتيم يجول ويصول فى محلات البقالة أو السوبر ماركت والمطاعم أو حتى مصانع الأغذية عمركوا شفتوا مراقب صحة يأخذ عينات من الميه من مناطق مختلفة من القاهرة لتحليلها ضد التلوث البكتيرى والمعادن الضارة مثل الرصاص والزرنيخ ليه الإهمال محمد على باشا أرسل مصريين تعد على اليد وقامت عليهم نهضة مازلنا ننعم بها الى الآن و بعثاتنا بالآلاف فى الأيام دى وفى عهدنا ده ولكننا بنتأخر وكأنهم راحوا اتعلموا ومالهمش دعوة بالبلد اللى صرفت عليهم وده تقصير موقعنا الجغرافى من أحسن المواقع وملتقى قارات العالم ونجمع أموال طائلة من استخدام أجوائنا ومطاراتنا للطائرات المدنية وخدمتها وقناة السويس الشريان الحيوى لجميع بواخر العالم وحتى صحرائنا مليئة بالكنوز المعدنية ورمالها تباع لصناعة الزجاج ورخامنا من أجود الأنواع بعد ايطاليا ومع كل ذلك مازال بيننا عائلات تبحث عن العشاء اولادهم بحارنا كنوز وسواحلنا ممتدة وفى وسطنا نيل خصب حتى أصبحنا كشبه جزيرة مورقة ولكن ذبلت أوراقها بفعل اللصوص والهباشين والتنابلة والمهملين أراضينا خصبة وضيعنا محصولنا الرئيسى من القطن الذى شهد له العالم وكانت تزدهر به بورصات العالم واتجهنا لزراعة الخضر والفاكهة بالكيماويات والمبيدات والهرمونات حتى لا طولنا القطن ولا أى محصول بديل ما تقولوش السرقة بس هى الفساد السبب فالفساد له أنواع ومنه الاهمال والتقصير المدمر الذى حولنا الى تنابلة السلطان ومازلنا ننتظر الدولة لتدبر لنا شؤوننا مع اهمالنا هذا ساعات العمل معظمها يقضيه الموظفون فى الأحاديث الجانبية والتسلية والدردشة واستعمال تليفونات الدولة للاتصال بالقرايب والأحباب والمسامرة والمتاجرة والمؤامرة وادارة أحوال الاسرة عن طريق تليفون الحكومة وفى أوقات العمل الرسمية دى كلها سرقات لمرافق الدولة ووقت عمل الدولة الذى يصرف عليه المرتبات لابد من هزة ومراقبة تليفونات الدولة من الكبير للصغير ولابد من المفتشين على كل كبيرة وصغيرة على الموظفين وأن تهتم أجهزة الرقابة بمحاربة الاهمال والتسيب وتضييع الوقت .. لا أن تهتم فقط بمطاردة اللصوص ولنعمل رقابة خاصة بملاحقة المهملين والتنابلة والمستغلين لمرافق الدولة حتى ينصلح حالهم والى أن يتعودوا على الانضباط والاستقامة فى العمل الجاد الذى يعود بالفائدة على مصر والمصريين وأن نتعود أن نعمل بدل أن نتكلم

JANO

5/11/2003

اعرف بلدك ... مدينة رشيد ...

اعرف بلدك ... مدينة رشيد ...

رشيد مدينة عريقة جدا قديمة جدا وبها من مقومات سياحية ما يجعلها قادرة على اخذ مكانة متقدمة جدا بين مدن مصر السياحية هذا بجانب ما تزخر به هذه المحافظة من تاريخ طويل فى مقاومة الاحتلال و الغزو الصليبى والانجليزى لعدة مرات حيث كانت لعدة قرون هى البوابة الرئيسية لمصر. مدينة رشيد رشيد أحدى مدن محافظة البحيرة فى العصر الحديث ، شهدت صورة من صور كفاح شعب البحيرة ضد المستعمر حيث ضرب أهلها أروع الأمثلة للبسالة والوطنية أمام حملة فريزر سنة 1807 والتى حاولت احتلال المدينة بينما لقنهم أهلها درسا فى الكرامة الوطنية والشجاعة والارادة الصلبة التى لا تنثنى . هى مدينة السحر والجمال . مدينة البحر والنيل ، مدينة أثرية من طراز خاص بها 12 مسجد أثرى و 22 منزل أثرى أنشئت فى العصر المملوكى والعثمانى وتحتل مدينة رشيد المرتبة الثانية بعد مدينة القاهرة من حيث كمية الأثار الاسلامية الموجودة بها والتى تتميز بطابع خاص تنفرد به هذه المدينة عن غيرها. قلعة قايتباى تقع فى الجهة الشمالية من مدينة رشيد بمسافة سبعة كيلو مترات أنشئت فى عهد قايتباى سنة 901 وعثر بها على حجر رشيد الذى فك رموزه العالم الفرنسى شامبليون بعد دراسة دامت حوالى 23 عاما وحجر رشيد موجود الان بالمتحف البريطانى طبقاً لمعاهدة 1801 الاثار الاسلامية مسجد زغلول ( 5985 - 1577 ) م يتكون من جامعين متصلين ببعضهما الشرقى يعرف بالإيوان والغربى أسس فى عهد زغلول وهو مملوك للسيد هارون أحد الأمراء فى القرن السابع عشر الميلادى وطول المسجد 90 مترا وعرضه48 مترا وبه 244 عامود من الجرانيت وسقفه على شكل قباب صغيرة على الطراز العثمانى ومنه صدرت اشارة بدء المقاومة الشعبية ضد حملة فريزر الذى أنتقم بتحطيم أحدى مئذنته . مسجد أبو مندور يقع على شبه جزيرة تسمى تل أبو مندور وهى ربوة على نيل رشيد ويعرف المسجد بإسم العارف بالله أبو النضر وهو من كربلاء من سلالة على بن ابى طالب كرم الله وجهه وللمسجد ثلاثة أبواب شمالى وشرقى وغربى وقد تم تجديده 1312 هـ مسجد العباسى ( 1224 هـ - 1809 م ) أنشأه محمد بك طبوذاده ويقع على شاطئ النيل جنوب رشيد وهو مبنى بالطوب المزركش وله مئذنة بجوارها قبة رائعة الجمال . مسجد سيدى على المحلى ( 1134 هـ - 1721 م ) وهو ثانى مساجد رشيد إتساعاً بعد مسجد زغلول ويمتاز ضريحة بأنه مبطن بالقيشانى الملون والخشب المخروط بأشكال متعددة ويقوم على 99 عموداً مختلفة الاشكال وله ستة أبواب ويضم مكتبة زاخرة بالكتب الإسلامية والمخطوطات مسجد المشيد بالنور ( 1178 هـ - 1764 م ) يقع فى الشارع الرئيسى وهو من المساجد الكبيرة ويقع على سبعة عشر عموداً والسقف على هيئة قباب وبه ثلاثة عشرة نافذة وله ثلاثة ابواب ومئذنة عالية مسجد الجندى ( 1133 هـ - 1721 م ) وهو ثالث مسجد برشيد من حيث الإتساع وقد أنشأه الأمير محمد الجندى وبنى على هيئة قباب من الطوب تقع على 39 عامود ذات أشكال جميلة متنوعة . مسجد العرابى ( 1219 هـ - 1804 م ) ويقع على رأس شارع دهليز الملك وهو الشارع الذى كانت توجد على جانبه مساكن الأمراء والمماليك فى عصر محمد على وللمسجد بابان احدهما غربى والأخر بحرى ويرتفع على 14 عامود وله مئذنة عالية مميزة من العصر المملوكى . مسجد دمقسيس المعلق ( 1116 هـ - 1714 م ) أنشأه صالح أغا دمقسيس وقد زخرفت واجهته البحرية بإستعمال الطوب فى تركيبات هندسية رائعة ترجع للعصر العثمانى وفى منتصف هذه الواجهة توجد مئذنة وعرف هذا المسجد بإسم المعلق لأنه يقع فى الدور الأول العلوى وجدارنه وحائط القبلة به مبطنان بالقيشانى الملون ويوجد به منبر خشبى من أجود المنابر الخشبية التى تمثل العصر العثمانى مسجد الصامت ( 1174 هـ - 1760 م ) شيده الإمام محمد بن عبدالرحمن وبه ضريحاً ويرتفع على تسعة اعمدة ومحرابة مغطى بالقيشانى وعلى يسار المسجد توجد حجرة صغيرة كانت تستخدم كتاباً لحفظ القرآن وعلى يمين المحراب باب يؤدى الى مقبرة صاحب المسجد وكذلك به مدفن العالم المجاهد الشيخ حسن كريت . مسجد الشيخ تقا ( 1123 هـ - 1721 م ) وهو مسجد صغير على بابه توجد لوحة كتب عليها إسم الشيخ تقا بالإضافة الى لوحة أعلى الشباك مكتوب عليها الحاج عثمان سنة 1139 منزل حسين عرب كلى بنى هذا المنزل فى منتصف القرن الثانى عشر الهجرى الثامن عشر الميلادى وصاحبه حسين عرب كلى الذى كان ، محافظا لمدينة رشيد فى هذه الفترة ويتكون المنزل من أربعة أدوار كلها من الطوب المكحول وحالياَ به متحف رشيد . منزل عصفور انشاه ابراهيم بلطيس عصفور عام 1168 هـ ـ 1754 م

طارق المملوك

5/11/2003

اعرف بلدك ... اعلام رشيد ..

اعرف بلدك ... اعلام رشيد ..

الشيخ محمد صالح الجارم هو العالم الفاضل و الشاعر الناثر صاحب التأليف العديدة و الرسائل المفيدة. الشيخ عبد الفتاح الجارم علامة عصره و فريد دهره الفقيه المحدث المفسر الحجة و الثقة المؤلف في كل فن . الشيخ ابراهيم الجارم كان جميل الطلعة سريع الخاطر قوي المعارض دائم البشر حسن الطلعة حفظ القرآن الكريم سافر مصر و جاوز الأزهر أخذ العلم من أكابر علمائه مثل الشيخ عبد القادر الرافعي و الشمس الأبنابي و الشيخ الإشراقي و الشيخ السقا و غيرهم تولى إقناء محافظة رشيد و تولى قضاء الشرقية ولد برشيد سنة 1261 هجرية و توفي يوم 7 محرم 1328 هجرية. الشيخ أحمد الجارم كان إمام مسجد علي المحلي و كان يمثل الإسلام قولا و عملا و يتحرى الحلال و الحرام بصورة دقيقة للغاية و يفهم الإسلام فهما شاملا و حين كانت هوجة عرابي 1882 لم يكتف الشيخ أحمد الجارم بدعوة الناس للجهاد بل تقدم مع مجموعة من علماء المسلمين و طلبوا تجريبهم على السلاح لمحاربة الإنجليز و لما طلب من الشيخ أحمد الجارم التوجه إلى دمنهور لإمتحان كفاءة العلماء بدمنهور رفض و قال لن أسافر و لن أتقدم لأي إمتحان إذا كانت الوزارة موافقة على بقائي إمام لهذا المسجد على هذا الحال كان بها و إذا لم توافق فسوف أستمر في الصلاة و لو من آخر المسجد و عندما جاء الخديوي عباس الثاني رشيد طلب منه الشيخ أحمد الجارم أن يكون مرتبه من حصيلة من مصلحة السكة الحديد ظنا من الشيخ أن أموال السكة الحديد خالية من التعامل بالربا. علي بك السلانكلي- و هو قائد كفاح شعب رشيد ضد حملة فريزر 1807 و هو محافظ رشيد آنذاك كما وضع خطة إبعاد المراكب عن مرسى رشيد إلى الضفة الشرقية حتى لا يتمكن الغزاة من و خلف الجدران و فوق المآذن ليعطوا إشارة الإنقضاض على الإنجليز. السيد حسن كريت- كان أول بطل في معركة رشيد سنة 1807 و هو نقيب الأشراف في رشيد و قد اتفق مع القائد الحاصين بها علي بك السلانكلي على إقتسام المقاومة الشعبية و كان على رأس وفد رشيد بعد النصر لإستعراض مظالم الأتراك بعد إنخذالهم في المعركة و تركهم النضال لأهل رشيد. زبيدة البواب هي السيدة زبيدة بنت محمد البواب الميزوني التي تزوج منها الجنرال مينو قائد الحملة الفرنسية بعد أن أسلم و تسمى بعبد الله مينو.

طارق المملوك

5/11/2003

قصة بناء .. هرم خوفو

قصة بناء .... هرم خوفو

البداية : ترجع قصة بناء هرم خوفو إلي زمن بعيد منذ حوالي 4700 سنة حين شرع خوفو في بناء هرمه بعد أن حصل على موافقة الإله رع وتم حشد كل الإمكانيات لتنفيذ هذا المشروع القومي الهام في أسرع وقت فتم إسناد أعمال التصميم إلى مكتب محرم-باخوم للأهرامات والمسلات أحد المكاتب الاستشارية المتميزة في ذلك الوقت كما تم تكليف رئيس الكهنة بمتابعة مراحل المشروع. الأعمال المعمارية : قام المهندس لا-طيف-رع بقسم المعماري بوضع فكرة المشروع المبدئية للتصميم وأنهاه (بعد عدة سنوات) ابنه المهندس نعم-طيف-رع كما قام بإعداد تخطيط الموقع كل من المهندس عص-فو-رع بعد عودته للمكتب والمهندس احم-صلا-رع وذلك باستخدام الخوفو-يوتر واشتروا لذلك الجهاز احدث البرامج للرسم خوفو كاد 14 تحت إشراف قسم الخوفو-يوتر حاكيمحتب وناصرست واقترح عاصمست اقتباس أحد المشروعات المماثلة في مكتب هاتور ببلاد الحيثيين وإدخاله على الإسكان-رع ولكن تم رفض الفكرة وتم إرسال عاصمست إلي مسقط رأسه في طيبة للخدمة في معابد آمون-رع لتعلم الفضيلة على أيدي كهنة المعبد. الأعمال الإنشائية : بدا المهندسان عبده تحسيس ومساعده حسيس بدراسة الأستاتيكل سيستم على أساس أن الهرم واقف على رأسه طبقا لتصميم المهندس لا-طيف-رع إلا أن المهندس هانيسيس اعترض على التصميم خوفا فقط من تأثير الزلازل و الرياح لأن الهواء كان شديداً في ذلك العصر كما اعترض أيضاً المهندس صاموليس على هذه الفكرة لأنها تتعارض مع كود الخرسانة الذي تنبأ رئيس الكهنة بأنه سيصدر بعد 4700 سنة. أعمال الحديد : ولذلك تم الاستعانة بقسم الحديد وقام المهندسان حام-رع وصا-لع باقتراح عمل أعمدة من الحديد على شكل زهرة اللوتس لتثبيت الهرم من أعلى إلى أسفل مع عمل الدعامات اللازمة وكانت النتيجة لكثرة هذه الدعامات أهنا كانت سبباً لرفض الفكرة نظراً لإعاقة سير العمل بالموقع وصعوبة إدخال الأحجار لمكان البناء فتم إلغاء الفكرة وكذلك قسم الحديد بالكامل وإلقاء جميع مهندسي الحديد في النيل في ذكرى وفاء النيل واعتبار كل من ينقب أو يعمل بالحديد عدواً لرع والمعبد . وهكذا فشلت الفكرة الأولى وأستأنف العمل بعد ذلك المهندس لا-طيف-رع لان لا-طيف-رع ترك المجموعة التي كانت تعيقه عن الإبداع وعمل مع مجموعة أخرى. تبييض المشروع : كان رئيس الكهنة قد اقترح أن يكون الهرم مستدير القاعدة ( مخروط ) إلا أن المعماريون صمموا الهرم سداسي لأن البرجل لم يكن موجوداً في هذا العصر لكن الإنشائيون فضلوا أن يكون الهرم رباعي لتقليل التكلفة. وبعد رسم المشروع وطبعه على رولات البردي وحساب الكميات تم تعديل التصميم طبقاً لطلب رئيس الكهنة ( ممثل المالك ) إلى هرم خماسي فتم رسمه وطبعه و حساب كمياته مرة أخرى وهكذا تم تغيير المشروع مرة أخرى بناء على طلب مهندس الحي إلى هرم ثماني ثم مستدير ( كان البرجل قد تم اختراعه ) ثم رباعي في النهاية ( ومن هنا ظهر تعبير كلمة تبييض لأن خوفو كان خلاص هيبيييـ....... خلاص). الكميات والمواصفات : تم إرسال المشروع برمته إلى قسم الكميات والمواصفات حيث قامت المهندستان هناتسوت ونهالتسوت بعمل كراسة كميات كبيرة اشتملت على بند واحد فقط هو توريد ورص أحجار ولكن تم اعتراض كبير الكهنة على كلمة رص أحجار أنها تعبير دارج في المقاهي وجعلها بند توريد ولصق أحجار وقد طلب خوفو أن تكون الكراسة بالهيروغليفية و الإنجليزية غالباً علشان السواح. وقامت المهندستان نهالتسوت و هناتسوت بحصر عدد أحجار الهرم سبع مرات للسبع تصميمات المختلفة وكان عددها 2.3 مليون حجر استغرقت عملية العد 15 سنة بالتمام والكمال ورغم ذلك طلعت الكمية غلط. أما بخصوص المواصفات فقد اشترطت أن تكون الأحجار مفرغة لكي تكون خفيفة على الأساسات . الأعمال الصحية : قامت المهندستان ربابسيس وسماحسيس باقتراح نظام لصرف المطر بواسطة ماسورة تخترق نصف الهرم وكذلك حجرة الدفن الرئيسية حتى قاعدة الهرم لتتجمع في خزان ارضي اسفل الهرم وتنقيتها باستخدام الشبة كي يستخدمها الملك خوفو مرة أخرى حينما يعود للحياة أما إذا لم يعود فإنه يتم استخدام قطيع من الأفيال يتم استيرادها خصيصاً من بلاد السند أو الهند لنزح المياه بخراطيمها من الخزان. المناظير والواجهات : اعد المهندس لا-طيف-رع العائد إلى المجموعة بعد فشله في المجموعة الأخرى منظورا كبيرا وأربعة واجهات متماثلة للهرم وقام بتلوينهم ابنه نعم-طيف-رع بواسطة الخوفو-شوب والمنقرع-درو . التسليم : وأخيراً تم تسليم المشروع بعد أن كلف المكتب الاستشاري 3 أضعاف الوقت و 4 أضعاف المصاريف و 5 أضعاف رولات البردي و6 أضعاف المجهود لكن المشروع كان را-ئع وقيل وقتها أن سبب التأخير هو رئيس الكهنة لأنه رفض أن تكون الواجهات بالحجر الفرعوني وفضل عليه الكيم-بليكو . و كالعادة أكل خوفو على الاستشاري بقية أتعابه بناء على نصيحة من رئيس الكهنة بحجة انه تأخر في تسليمه رسومات الصحي فغضبت الآلهة جداً من رئيس الكهنة لتسببه في تأخير المشروع و خسارة الاستشاري فعاقبته بتحويله إلى تمثال كبير من الحجر و هو ما يعرف حالياً بأبي الهول. الترخيص: كان من المقرر أن ينشأ الهرم في أول شارع الهرم بجوار النفق لكن إدارة التراخيص اعترضت لأن ارتفاعه 146 متر يزيد عن 1.5 عرض الشارع فتم اختيار موقع آخر في الصحراء لا يوجد به أي شوارع تفادياً اعتراض إدارة التراخيص التي كان يرأسها المهندس طا-رع و الذي تم رفده من الإدارة لتلبثه بتقاضي رشوة و يعمل الآن في مكتب آ-سا. الأعمال الهيدروليكية: اعترض المهندس وائيليوس أغسطس البطلمي الوافد من حضارة الإغريق على موقع الهرم الجديد حيث أنه يقع في مخر السيل الذي قضى على حضارة الإغريق و كان هو الناجي الوحيد من الإغريق فتم أخذ بردية تعهد على خوفو يقسم فيها بشرف الإله رع بتحمله المسئولية كاملة على اختيار الموقع و هذه البردية محفوظة إلى الآن في المتحف المصري بجوار مومياء الملك خوفو. إدارة المشاريع: تم طرح المشروع في مناقصة محدودة بين المقاولين المتخصصين و دعا خوفو للمشروع 4 شركات هي مينا للإنشاءات و مينا للمسلات و مينا للأهرامات و مينا للمدافن السياحية و قام المهندستان إيمانتيتي و غادتيتي بدراسة العطاءات و تم ترسية العطاء على شركة مينا للأهرامات لكن المشروع لم يسند إليها بحجة أنه (كما أدعى خوفو) ليس سابقة خبرة في رص الأحجار لأن كل الأهرامات التي تولت تنفيذها كانت مدرجة و ليست مثل هرم خوفو و أسند المشروع إلى شركة المقاولون الـ-رع-ب بأمر التكليف المباشر باعتبارها أحد مؤسسات الدولة رغم أن خبرتها كانت في الكباري العلوية فقط. التنفيذ: تم إسناد إدارة الإشراف على التنفيذ إلى المهندس طا-سا-رع المهندس بقسم الإشراف على التنفيذ و بدأ التنفيذ بذبح قربان للآلهة بمعبد آمون رع الكبير بمدينة طيبة وسط احتفال شعبي كبير حضره السادة ممثلي دوائر المملكة. ولكن لم ينجح هذا القربان في تفادي مشاكل التنفيذ المعتادة كعوائق الموقع و وصلات الكهرباء و المياه و تخصيص حصان لانتقالات المهندس طا-سا-رع. و لكن تم التغلب على العوائق كلها و بدأ المقاول عمله بتوريد كمية كبيرة من الأحجار كي يأخذ قيمتها كتشوينات و متوسط وزن الحجر الواحد 2.5 طن لذا لزم الأمر شراء عدد 100.000 ثور لنقلها من المحاجر القريبة إلى الموقع مما تسبب في عمل مجاعة كبيرة للشعب و تم تعيين عدد كبير من الخفراء لحراسة الأحجار لحسن حد يسرقها و يجري. و أثناء التنفيذ قام خوفو بتغيير التصميم مرتين فقد غير مكان حجرة الدفن مرتين و زاد حجم الهرم و قد أدى هذا التغيير إلى بناء 3 حجرات للدفن. نهاية خوفو: و جاء دور غضب الآلهة على خوفو فلم تسمح له بدخول الهرم حيا أو ميتا إذ توفى الملك قبل أن يرى حلم عمره فاقترحوا دفنه في ترب الغفير لكن رئيس الكهنة اعترض فتم حفظه مؤقتا في تابوت زجاجي بالمتحف المصري على أن يتم نقله بعد ذلك للهرم بعد انتهائه لكنه ظل هناك حتى الآن فرجة للجميع إذ إنهم ألغوا فكرة النقل خوفا عليه من انتقام صاحب شركة مينا للأهرامات و ذلك لأن الأمن و الحراسة بالمتحف المصري أقوى منها عند الهرم. النهاية: و أخيراً تم الانتهاء من بناء الهرم و تم افتتاحه في احتفالات 6 أكتوبر بعد أن اشترك في بناءه 100.000 عامل عملوا على بناءه 3 أشهر سنوياً لمدة 20 سنة كاملة كما ذكر المؤرخون الذين لم يذكروا مدة التصميم و السبب جلي و واضح. طارق المملوك

5/11/2003

فى بلدنا القاب

فى بلدنا القاب

امبارح بعد يوم عمل شاق وطويل جدا حتى ما لحقتش الفطار روحت بيتنا ولاقيت جدتي عاملة لى سندوتش جبنة رومى وكوباية عصير برتقال وقعدت زى الباشا اخد قطمة من السندونش وحبة عصير وكنت باتفرج على فيلم المولد . الحقيقة لاقيت حاجة مش مظبوطة،،،، الواد حرامي ومهرب ويقولوا له يا باشا ( اللى هو عادل امام فى الفيلم) علشان القرشين اللى معاه ،،،،،احنا المصريين نموت في حاجة اسمها القاب ‏مـش عـارفة ليه أو من ‏غير ليه (على رأي المرحوم عبد الوهاب) ‏واللى انا عارفاه ان كـان مـن أهداف‏ ثورة 23 يوليـو القضاء ‏على الألقــاب ولكن الظاهر ان ده ما حصلش ما علينا فعندك مثلا لو ناديت على أي واحـد ربنا ‏كرمهُ وخد ‏شهادة عالية وناديت عليه بأسمه ‏اللى ربنا رزقه بيه ‏يقوم كده يبصلك ‏ويقولك : هـو فلان ده ‏بيلعب معاك؟ انت مش ‏عارف بتكلم مين؟ إزاي ‏بقي لازم تقوله يا ‏دكتور / يا باشمهندس/يا أستـاذ ‏حتى ولو كان ساقط ‏إعدادية لازم تديـله لقب اُمال فين الاحترام؟؟؟؟؟؟؟؟ ولما تييجى تقوله ‏يا عم على مهلك كده ‏وخليك متواضع ‏علشان الناس تحبك وبلاش اللون ساعتها بس يـقوم يقولك ربنا ‏ قال وجعلناكم ‏طبقات (وتلاقيه ما ‏بيركعـهاش ومايعرفش فين الجامع) عندك مثلاً تاني ‏فيه واحد لواء جارنا(وهذه مهنه ‏تنتهي بنهاية الخدمة) ‏لكن سيادة اللواء ‏بيزعل أوي لو اى واحد ‏عايز يكلمه وقال يا استاذ ولما حطش قدام اسمه لقب ‏سيادة اللواء طب يا ‏سيادة اللواء ‏تسمح لى أناديك ‏وأقولك يا سيادة اللواء ‏السابق؟ ‏ يا إخوان إذا كان ‏الموضوع موضوع ‏احترام فيكون ‏للشخص أو السن ‏ومش للمهنة مش ‏يكون يادوب الواد ‏واخدله حته شهادة ‏ولسه بياخد المصروف ‏من بابا او ماما ويبص كده ‏من البلكونه أو من بير السلم وينده ‏علي راجل في عمر ‏أبوه (يا فلان روح هات ‏لي كذا)!!!!!!!!!! برضه ما يصحش يا اخى خلى عند البعيد دم ‏ واحترم سن الراجل وياسلام بقي لو ‏لسه متخرج من كليه الشرطة يا سلام سلم ‏البيه راح والبيه جه ‏وكمان الباشمهنس ‏لسه متخرج بابا جاب ‏له واسطة وأشتغل ‏في عثمان ( او عندنا فى شركتنا) يقوم بقي ‏الواد كده ييجي الصبح ‏عا المكتب واول حاجه ‏يقولها للساعي ‏الغلبان: قهوة مظبوط ‏يافلان آل أية الواد ‏صاحب مزاج قوي ‏او يدخل على المكتبعندى لابس شورت واقول هو انت فى ادارة ايه يا اخ ويرد على ويقول لى انكل قال لى شوف الإدارة اللى انت عايزاها واكيد احنا كلنا بنشوف ناس كده كتير قوى الصيدلى لازم تقوله يا دكتور الواد او البت من دوول يكون لسه فى اعدادى طب او صيدله تلاقيه معلق البالطو الابيض على ايده ويا ويل من لم يناديه بأسمه من غير لقب دكتور حاول كده مثلا ان تقدم طلب تعين بشركه لاابد وان تكتب الاول السيد الاستاذ الدكتور المهندس الكيميائي رئيس مجلس الاداره فلان الفلاني وحتى اللى ربنا كرمه وجاله عقدعمل بالسعوديه لازم لما يرجع تقوله يا حاج وحتى حاج دى مش مضمونة برضة اصل في واحد جارنا الشقة في وش الشقة كاتب على الباب (رجل أعمال) بس بالانجليزى يا مرسي حتى الهجاية بتاعتها غلط المهم ضرب خناقة مع البواب ازاى وازاى يقول له يا حاج انا رجل اعمال ازاى تقول لى يا حاج انا راضية تقولوا لى يا اسمك ايه برضة اخف من جانو وعجبيييييييي

jano

4/11/2003

تعالوا نتكلم في المفيد...........

تعالوا نتكلم في المفيد...........

إزاي ننفع مصر؟؟؟؟ أيه رأيكم لو نبدأ بالكلمة الشهيرة (إعرف بلدك)، دي كلمة سمعناها كتير عايزين نطبقها بفكر متطور شوية و هو اننا نشجع السياحة الداخلية. إيه فايدة السياحة الداخلية؟ كلنا يعرف أن الأقتصادالمصري بيعتمد إلى حد كبير على السياحة و عندنا في مصر فنادق كتيييييييييير قوي، تخيلوا معايا لو حصل مشكلة في منطقة الشرق الأوسط أول حاجة بتتأثر في مصر هي السياحة و بتنزل لمعدلات قليلة قوي حوالي 4%،تخيلوا معايا الناس اللي بتشتغل في القرى السياحية مبتقبضش مرتباتها ده لو الفنادق مسرحتش الناس و مش بس كده، الشركات الخدمية اللي بتخدم القرى و الفنادق بتتأثر و هالوماجرا. لكن لو السياحة الداخلية منتعشة والناس كلها بتتجه للسياحة الداخلية بدل متسافر بره أكيد السياحة مش هاتتأثر و تقع و ده بفضل ولادها المصريين.طب وإيه الجديد ماكلنا عارفين الكلام الهكس ده، لكن ايه رأيكم نعمل حاجةجديدة!!!!!كل واحد راح فندق أو قرية سياحية يكتب عنها و يوصف جمالها و يوصف الخدمة اللي لقاها و دفع ايه في الكلام ده بحيث اننا نبقى عارفين أماكن جديدة و يبقى عندنا الفضول نزورها و أي حد يخش على الجروب ممكن يستفيد من الكلام ده و بمرور الوقت يمكن يبقى سايت سياحي ، الله أعلم.................اللي موافق على الفكرة يبعت يقول موافق و اللي مش موافق يقول وليه مش موافق

وائل صابر

4/11/2003

ايه هى مصر

ايه هى مصر

سؤال بيخطر على بالى كل ما ابص لنفسي او ابص الى شباب اليومين دول وعاوزة اسأل كل شاب وشابة وخاصة اللى اتولدوا بعد الانفتاح او فى عهدهمين هى مصر وايه هى مصر هل هى مجرد ارض وحدود ومجموعة من البشر هلى هى علم ونشيد وعنوان وجنسيةايه هى مصرقيمتها ايه فى عينيكم لا بتسمعوا ام مصر بتحسوا كأنكم فيه حد بينادى عليكم او على شخص تعرفوههل حقا فقدنا فعلا احساسنا الحقيقى بيها من احد الاخطاء التى وقعنا فيها اننا فقدنا قوميتنا مرة نقول نحن فراعنه ومرة نقول نحن مسلمينومرة نقول نحن عربومرة نقول نحن مصريينولكن هل احنا فعلا نرتبط باى اسم من الاسماء دى اشك

jano

4/11/2003

1- قصيدة بهية

.. بهيـــــــة ..

يسبق كلامنا سلامنا

يطوف ع السامعين معنا

عصفور محندق يزقزق

كلام موزون و له معنى

عن الارض سمرا

و قمرا

و ضفه و نهر و مراكب

و رفاق مسيرة عسيرة

و صورة حشد و مواكب

ف عيون صبية بهية

عليها الكلمة و المعنى

***

مصر يا امّة يا بهية

يام طرحة و جلابية

الزمن شاب و انتي شابة

هو رايح و انتي جاية

جايه فوق الصعب ماشية

فات عليكي ليل و مية

و احتمالك هو هو

و ابتسامتك هي هي

تضحكي للصبح يصبح

بعد ليلة و مغربية

تطلع الشمس تلاقيكي

معجبانية و صبية

يا بهية

***

الليل جزاير جزاير

يمد البحر يفنيها

و الفجر شعلة ح تعلا

و عمر الموج ما يطويها

و الشط باين مداين

عليها الشمس طوافة

ايدك في ايدنا

ساعدنا

دي مهما الموجة تتعافى

بالعزم ساعة جماعة

و بالأنصاف نخطيها

***

مصر يا امّة يا سفينة

مهما كان البحر عاتي

فلاحينيك ملاحينيك

يزعقوا للريح يواتي

اللي ع الدفة صنايعي

و اللي ع المجداف زناتي

و اللي فوق الصاري كاتب

كل ماضي و كل آتي

عقدتين و التالته تابتة

تركبي الموجة العفية

توصلي بر السلامة

معجبانية و صبية.. يا بهية

***

و يعود كلامنا في سلامنا

يطوف ع الصحبة حلواني

عصفور محني يغني

على الأفراح ومن تاني

يرمي الغناوي تقاوي

تبوس الأرض

تتحنى

تفرح

و تطرح

و تسرح

و ترجع تاني تتغنى

اللي بنى مصر كان في الأصل حلواني

1969م