هو فاضل كام يوم على السفر يا بابا ؟

فاضل كام يوم على السفر يا بابا ؟

******

خلاص يا حبيبتى النهارده .. - طيب هو ليه احنا لازم نمشى قبلك وتتأخر علينا شهر بحاله ليه يعنى ما تسافرش معانا كده كلنا مع بعض؟ - أيوه ياحبيبتى معلهش علشان لازم الأجازات بتاعتى تترتب و يتوافق عليها فى الشغل ومش كل مرة بقدر أسافر معاكى انتى وماما واخواتك - هو كل حاجة الشغل الشغل ؟؟... انت ليه مش بترفض وتقول لهم أنا لازم أروح مع أولادى وكده يعنى ؟ - والله فكرة يا أميرة ...... ممكن السنة الجاية إن شاء الله ... وهاقولهم أميرة بنتى قالت كده.. - ابتسمت أميرة منى وقالت لى انت فاكرنى لسه صغيرة ؟... هو فيه حد فى الشغل بتاعك ده أصلا يعرفنى؟؟ - أدهشنى الرد وأحسست بمعنى وضرورة أن أكون أكثر إنصاتا واهتماما بإيجاد المناسب من الردود حتى لأميرة بنتى حبيبتى والتى لا تقابلنى إلا بقبلة أو حضن يتبعه طلب وإلا ...... مفيش حضن بعد كده..! اعتدت أن أسمع منها مثل تلك الأسئلة البسيطة و المنطقية و كثيرا ما أعيتنى الحيل فى محاولة إيجاد الإجابات الشافية التى تقنعها ولا تتسبب فى فتح وابلا آخر من الأسئلة مما يضطرنى تحت ضغطها باللجوء لأمها طلبا للمساعدة. مع اقتراب ميعاد السفر تتوتر الأعصاب وتزداد المشتريات وتكثر الأسئلة من نوعية :- - الفستان ده مناسب لماما ؟؟ طيب لأم محمد ؟؟ طيب إيه رأيك ناخد لثريا بنت أختى إيه بمناسبة الخطوبة طقم القهوة اليابانى ولا مفرش السفرة ؟؟ جبت حاجة للبواب وبتاع الجراج ... أوعى تكون نسيت ؟؟؟ الله انت ساكت ليه مش بترد ؟ - ياستى خدوا اللى انتوا عايزينه انا عامل حسابى متخافيش والحقيقة انا ناسى طبعا ولكن رديت بصوت جاهدت أن يأتى طبيعيا ..انا الحقيقة أخاف أشور عليكى فى حاجة تطلع مش مزبوطة ... إيه رايك كلميهم فى التلفون و شورى عليهم ..! - إيه ده ؟ معقول حد يسأل التانى ويقوله أجيب لك إيه هدية ... بأه ده أسمه كلام..؟ - خلاص يا ستى آسف بلاش تكلميهم .. على فكرة إعملى حسابك فى الوزن انا باتحرج وممكن تبقى مشكلة فى المطار ونضطر ندفع فلوس على حاجة ما تستاهلش.. - الله يعنى جات على الكام كيلو الزيادة بتوع الهدايا ؟؟ - لا يا ستى ولا يهمك انا هاتصرف سيبى لى أنا توضيب ورص الشنط ... كلما اقترب الميعاد يخفق قلبى فرقا وفزعا هاقعد لوحدى ازاى بعد الشغل ؟؟ ده أم أميرة هى اللى بتعمل لى الفطار بعد الفجر وتودعنى كل يوم عالباب ... يا الله.. ياترى هاستحمل ... يارب تكون فى عونى وتساعدنى ... يا خبر أبيض و أميرة ده انا ماعرفش أقعد من غيرها .. والرسومات اللى كل يوم توريهالى والرسم عالكمبيوتر ... ضاقت الدنيا فى وجهى .... ولبست على عجل وقررت الذهاب لأمر عاجل طالما راودنى ولم أجرؤ على تنفيذه... فى مكتب الطيران انت متأكد يا أستاذ انك مش عايز الأسرة تسافر النهاردة . أيوه ياسيدى رجاءا نشوف ميعاد بعد أسبوع ولا حاجة. ياترى سيادتك فاهم يعنى إيه تلغى الحجز ؟؟ مفيش كراسى لحد شهرين قدام...! ياسيدى مش مهم يبقى يحلها حلال.. طيب انا قاعد لحد الساعة 5 مساءا .. يعنى راجع نفسك.. لا يا سيدى كتر خيرك .. انا متأكد اجلت لهم السفر واللى يحصل يحصل ... يانهار أبيض غمة وانزاحت ... معقولة هاقعد لوحدى من غير أميرة ما تستقبلنى و أنا راجع من الشغل ... - آلو.. أيوة انت فين من الصبح ..؟ السفر النهاردة وانت ما ساعدتنيش فى الشنط ولا جبنا هدية لأام محمد ولا بنت أختى ... قاطعتها قائلا أنا لغيت السفر و أجلته شوية .. صمت ثم هيييييه والله بجد ؟؟ جاء صوتها عبر الهاتف مستبشرا فرحا بجد والله لحد إمتى .؟ والله مش عارف بأة ربنا يسهل. الحمد لله تعالى بأة افطر ...انا عاملالك طبق فول وبيض مقلى بالسمنة البلدى اللى ماما بعتاها لى إنما يجنن .... كان نفسى مرة ما بقاش ملتزم ... تعبت من النظام ....

******

حسام الجمال

23-6-2007

الشياطين الحمر .. ومنع ملك الموت من زيارتهم

الشياطين الحمر .. ومنع ملك الموت من زيارتهم

*****

منذ يومان إستطدم احد لاعبى فريق الشياطين الحمر بأحد رجالات طلائع الجيش وإرتمى أرضا من شدة ألم الخبطة ( نتمنى له العافية ) وبالتالى يحدث دائما مثل هذا ولكن مادعانى لهذه السطور هو انه بمجرد أن وقع هذا اللاعب متألما .. وبدأت مسرحية غريبه .. لاعبى الفريقين أصابتهم لوثه منهم من يتعلق فى شباك الجون والآخر يشد شعره والثالث يبكى والخامس ينزل بقدميه على الأرض فى مشهد لعل الكاميرا المثبته فى المقصوره تأتى به ومنهم من يصول للبحث عن كامير تسجل بكاءه التمثيلى والآخر يجول ويدور حول نفسه خوفا من إقتراب ملك الموت من هذا اللاعب المصاب أو زيارته !!! .. وخلال عملية نقل اللاعب وجدت الجماهير الغفيرة والتى لم تصلى المغرب ولا العشاء ( تزعط ) من اعماقها وتقول يارب يارب فى هتاف لايختلف كثيرا على هيلا هووب او قاعدين ليه ماتقومو تروحوا وإن إختلفت اللحظة .. فهم جماهير الشياطين وماادراك ماتتنعم فيه هذه الشياطين فضلا عن قداسه كل من ينتمى لهذا النادى وبالتالى تم تجنيد جميع مستشفيات قاهرة المعز بما فيهم القريبه من الاستاد لإستقبال الحاله .. ولم لا ؟؟!!؟؟ وهو من ضمن الشياطين الحمر وليذهب ملايين ممن بطوابير المرضى وآلامهم اليومية والمنتظرة للعلاج للجحيم !!! ومما أدهشنى أنه بمجرد ان هموا بإدخاله المستشفى كانت توجد أمرأة ربما دكتوره على الجنب وسرعان مارأت المنظر حتى بدأت تصوت وتولول وتجرى ناحيته وكأنه فلذه كبدها وتضرب على جسدها ووجهها وربما إن لم تكن فى النوبتجية لشقت الجيوب ولطمت الخدود بما يليق بولائها للشياطين الحمر وحدث الهرج والمرج وزحفت مصر كلها عن بكره أبيها مساءا للإطمئنان على سلامة الاعب ولتسجل الصحافة والاعلام انتصارات وانكسارات وإسهالات الشياطين نسينا أن ملك الموت يأتى بأى لحظة وبغته ولايمنعه جماهيرلاهية تشجع الشياطين أو حتى الأبالسه !!! و فضلت مشاهدتهم بالاستاد عن الوقوف بين يدى الله لصلاة المغرب والعشاء !!! نسينا انه ربما يأتينا الموت ونحن بأوضاع واماكن نعصى المولى سبحانه .. اتمنى ان ندرك جميعنا أن الموت لاينتقى أو يختار وكلنا آتيه لحظات فراقنا من هذه الدنيا ولكن ينبغى ان لاننسى انه سيأتى فجأة ولن ولم يمهلنا ولو دقيقة واحده من وقتنا الضائع ..ولكن ألا من معى.. فى أنه ينبغى ان نختار لأنفسنا موته كريمة نحاج بها الله يوم أن نلقاه فى ان آخر كلامنا كان تسبيحة أو إستغفار ..أو لا إله إلا الله محمد رسول الله بدلا من إضاعة صلاة المغرب والعشاء لمشاهدة الشياطين لست زملكاوى ولا مصراوى أو حتى إنباوى ولكن متى نتيقن من أن الصلاة هى عماد الدين وانها صلة بين العبد وربه وأنها اول مايحاسب عليه المرء يوم القيامه وأن الفرق بين الرجل والكفر .. ترك الصلاه تمنياتنا للاعب بالصحة والعافية والهداية لنا ولجماهير الشياطين جميعا قبل ان يزورنا أو يزورهم ملك الموت فى مباراه أخرى ***** طارق الالفى

10-6-2007