فاضل كام يوم على السفر يا بابا ؟
******
خلاص يا حبيبتى النهارده ..
- طيب هو ليه احنا لازم نمشى قبلك وتتأخر علينا شهر بحاله ليه يعنى ما تسافرش معانا كده كلنا مع بعض؟
- أيوه ياحبيبتى معلهش علشان لازم الأجازات بتاعتى تترتب و يتوافق عليها فى الشغل ومش كل مرة بقدر أسافر معاكى انتى وماما واخواتك
- هو كل حاجة الشغل الشغل ؟؟... انت ليه مش بترفض وتقول لهم أنا لازم أروح مع أولادى وكده يعنى ؟
- والله فكرة يا أميرة ...... ممكن السنة الجاية إن شاء الله ... وهاقولهم أميرة بنتى قالت كده..
- ابتسمت أميرة منى وقالت لى انت فاكرنى لسه صغيرة ؟... هو فيه حد فى الشغل بتاعك ده أصلا يعرفنى؟؟
- أدهشنى الرد وأحسست بمعنى وضرورة أن أكون أكثر إنصاتا واهتماما بإيجاد المناسب من الردود حتى لأميرة بنتى حبيبتى والتى لا تقابلنى إلا بقبلة أو حضن يتبعه طلب وإلا ...... مفيش حضن بعد كده..!
اعتدت أن أسمع منها مثل تلك الأسئلة البسيطة و المنطقية و كثيرا ما أعيتنى الحيل فى محاولة إيجاد الإجابات الشافية التى تقنعها ولا تتسبب فى فتح وابلا آخر من الأسئلة مما يضطرنى تحت ضغطها باللجوء لأمها طلبا للمساعدة.
مع اقتراب ميعاد السفر تتوتر الأعصاب وتزداد المشتريات وتكثر الأسئلة من نوعية :-
- الفستان ده مناسب لماما ؟؟ طيب لأم محمد ؟؟ طيب إيه رأيك ناخد لثريا بنت أختى إيه بمناسبة الخطوبة طقم القهوة اليابانى ولا مفرش السفرة ؟؟ جبت حاجة للبواب وبتاع الجراج ... أوعى تكون نسيت ؟؟؟ الله انت ساكت ليه مش بترد ؟
- ياستى خدوا اللى انتوا عايزينه انا عامل حسابى متخافيش والحقيقة انا ناسى طبعا ولكن رديت بصوت جاهدت أن يأتى طبيعيا ..انا الحقيقة أخاف أشور عليكى فى حاجة تطلع مش مزبوطة ... إيه رايك كلميهم فى التلفون و شورى عليهم ..!
- إيه ده ؟ معقول حد يسأل التانى ويقوله أجيب لك إيه هدية ... بأه ده أسمه كلام..؟
- خلاص يا ستى آسف بلاش تكلميهم .. على فكرة إعملى حسابك فى الوزن انا باتحرج وممكن تبقى مشكلة فى المطار ونضطر ندفع فلوس على حاجة ما تستاهلش..
- الله يعنى جات على الكام كيلو الزيادة بتوع الهدايا ؟؟
- لا يا ستى ولا يهمك انا هاتصرف سيبى لى أنا توضيب ورص الشنط ...
كلما اقترب الميعاد يخفق قلبى فرقا وفزعا هاقعد لوحدى ازاى بعد الشغل ؟؟ ده أم أميرة هى اللى بتعمل لى الفطار بعد الفجر وتودعنى كل يوم عالباب ... يا الله.. ياترى هاستحمل ... يارب تكون فى عونى وتساعدنى ... يا خبر أبيض و أميرة ده انا ماعرفش أقعد من غيرها .. والرسومات اللى كل يوم توريهالى والرسم عالكمبيوتر ... ضاقت الدنيا فى وجهى .... ولبست على عجل وقررت الذهاب لأمر عاجل طالما راودنى ولم أجرؤ على تنفيذه...
فى مكتب الطيران
انت متأكد يا أستاذ انك مش عايز الأسرة تسافر النهاردة .
أيوه ياسيدى رجاءا نشوف ميعاد بعد أسبوع ولا حاجة.
ياترى سيادتك فاهم يعنى إيه تلغى الحجز ؟؟ مفيش كراسى لحد شهرين قدام...!
ياسيدى مش مهم يبقى يحلها حلال..
طيب انا قاعد لحد الساعة 5 مساءا .. يعنى راجع نفسك..
لا يا سيدى كتر خيرك .. انا متأكد
اجلت لهم السفر واللى يحصل يحصل ... يانهار أبيض غمة وانزاحت ... معقولة هاقعد لوحدى من غير أميرة ما تستقبلنى و أنا راجع من الشغل ...
- آلو.. أيوة انت فين من الصبح ..؟ السفر النهاردة وانت ما ساعدتنيش فى الشنط ولا جبنا هدية لأام محمد ولا بنت أختى ... قاطعتها قائلا
أنا لغيت السفر و أجلته شوية ..
صمت ثم هيييييه والله بجد ؟؟ جاء صوتها عبر الهاتف مستبشرا فرحا
بجد والله لحد إمتى .؟
والله مش عارف بأة ربنا يسهل.
الحمد لله تعالى بأة افطر ...انا عاملالك طبق فول وبيض مقلى بالسمنة البلدى اللى ماما بعتاها لى إنما يجنن ....
كان نفسى مرة ما بقاش ملتزم ... تعبت من النظام ....
******
حسام الجمال
23-6-2007