فاضل كام يوم على السفر يا بابا ؟
******
خلاص يا حبيبتى النهارده ..
- طيب هو ليه احنا لازم نمشى قبلك وتتأخر علينا شهر بحاله ليه يعنى ما تسافرش معانا كده كلنا مع بعض؟
- أيوه ياحبيبتى معلهش علشان لازم الأجازات بتاعتى تترتب و يتوافق عليها فى الشغل ومش كل مرة بقدر أسافر معاكى انتى وماما واخواتك
- هو كل حاجة الشغل الشغل ؟؟... انت ليه مش بترفض وتقول لهم أنا لازم أروح مع أولادى وكده يعنى ؟
- والله فكرة يا أميرة ...... ممكن السنة الجاية إن شاء الله ... وهاقولهم أميرة بنتى قالت كده..
- ابتسمت أميرة منى وقالت لى انت فاكرنى لسه صغيرة ؟... هو فيه حد فى الشغل بتاعك ده أصلا يعرفنى؟؟
- أدهشنى الرد وأحسست بمعنى وضرورة أن أكون أكثر إنصاتا واهتماما بإيجاد المناسب من الردود حتى لأميرة بنتى حبيبتى والتى لا تقابلنى إلا بقبلة أو حضن يتبعه طلب وإلا ...... مفيش حضن بعد كده..!
اعتدت أن أسمع منها مثل تلك الأسئلة البسيطة و المنطقية و كثيرا ما أعيتنى الحيل فى محاولة إيجاد الإجابات الشافية التى تقنعها ولا تتسبب فى فتح وابلا آخر من الأسئلة مما يضطرنى تحت ضغطها باللجوء لأمها طلبا للمساعدة.
مع اقتراب ميعاد السفر تتوتر الأعصاب وتزداد المشتريات وتكثر الأسئلة من نوعية :-
- الفستان ده مناسب لماما ؟؟ طيب لأم محمد ؟؟ طيب إيه رأيك ناخد لثريا بنت أختى إيه بمناسبة الخطوبة طقم القهوة اليابانى ولا مفرش السفرة ؟؟ جبت حاجة للبواب وبتاع الجراج ... أوعى تكون نسيت ؟؟؟ الله انت ساكت ليه مش بترد ؟
- ياستى خدوا اللى انتوا عايزينه انا عامل حسابى متخافيش والحقيقة انا ناسى طبعا ولكن رديت بصوت جاهدت أن يأتى طبيعيا ..انا الحقيقة أخاف أشور عليكى فى حاجة تطلع مش مزبوطة ... إيه رايك كلميهم فى التلفون و شورى عليهم ..!
- إيه ده ؟ معقول حد يسأل التانى ويقوله أجيب لك إيه هدية ... بأه ده أسمه كلام..؟
- خلاص يا ستى آسف بلاش تكلميهم .. على فكرة إعملى حسابك فى الوزن انا باتحرج وممكن تبقى مشكلة فى المطار ونضطر ندفع فلوس على حاجة ما تستاهلش..
- الله يعنى جات على الكام كيلو الزيادة بتوع الهدايا ؟؟
- لا يا ستى ولا يهمك انا هاتصرف سيبى لى أنا توضيب ورص الشنط ...
كلما اقترب الميعاد يخفق قلبى فرقا وفزعا هاقعد لوحدى ازاى بعد الشغل ؟؟ ده أم أميرة هى اللى بتعمل لى الفطار بعد الفجر وتودعنى كل يوم عالباب ... يا الله.. ياترى هاستحمل ... يارب تكون فى عونى وتساعدنى ... يا خبر أبيض و أميرة ده انا ماعرفش أقعد من غيرها .. والرسومات اللى كل يوم توريهالى والرسم عالكمبيوتر ... ضاقت الدنيا فى وجهى .... ولبست على عجل وقررت الذهاب لأمر عاجل طالما راودنى ولم أجرؤ على تنفيذه...
فى مكتب الطيران
انت متأكد يا أستاذ انك مش عايز الأسرة تسافر النهاردة .
أيوه ياسيدى رجاءا نشوف ميعاد بعد أسبوع ولا حاجة.
ياترى سيادتك فاهم يعنى إيه تلغى الحجز ؟؟ مفيش كراسى لحد شهرين قدام...!
ياسيدى مش مهم يبقى يحلها حلال..
طيب انا قاعد لحد الساعة 5 مساءا .. يعنى راجع نفسك..
لا يا سيدى كتر خيرك .. انا متأكد
اجلت لهم السفر واللى يحصل يحصل ... يانهار أبيض غمة وانزاحت ... معقولة هاقعد لوحدى من غير أميرة ما تستقبلنى و أنا راجع من الشغل ...
- آلو.. أيوة انت فين من الصبح ..؟ السفر النهاردة وانت ما ساعدتنيش فى الشنط ولا جبنا هدية لأام محمد ولا بنت أختى ... قاطعتها قائلا
أنا لغيت السفر و أجلته شوية ..
صمت ثم هيييييه والله بجد ؟؟ جاء صوتها عبر الهاتف مستبشرا فرحا
بجد والله لحد إمتى .؟
والله مش عارف بأة ربنا يسهل.
الحمد لله تعالى بأة افطر ...انا عاملالك طبق فول وبيض مقلى بالسمنة البلدى اللى ماما بعتاها لى إنما يجنن ....
كان نفسى مرة ما بقاش ملتزم ... تعبت من النظام ....
******
حسام الجمال
23-6-2007
هناك ١٠ تعليقات:
والله يا استاذ حسام قرار هايل اهنئك عليه ، انا انهارده كنت فى المطار لان اختى الحمد لله رجعت انهاردة من الامارات برضه، و برضه رجعت هى وولادها و زوجها لسه هييجى كمان شهر ، و انا فى المطار قعدت اتفرج و لقيت انه يأب راجع و عائلته هنا ، يا ام و اولادها من غير زوجها ، بجد اتأثرت قوى للتفكك اللى سببته الحياة الصعبة و محاولة الحصول على عيشة كريمة ،
كان نفسى اقول لاختى ما كنتى تستنى و ترجعى مع زوجك بس طبا الكل اعتبرنى جاحدة و مش عايزة اختى مع انى لو عليا عايزاها هنا على طول بس اتاثرت قوى لما لقيت ابنها بيقول فاضل 23 days
و بابا يرجع و لهفته لما التليفون رن عشان يكلم باباه و حتى بنتها اللى عندها 3 سنين كانت مش فاهمة و كل ما جرس الباب يدق تقول بابا ، بجد اضايقت ، احييك على قرارك و يا رب يجمع كل العائلات عللى خير
باكينام ناصر
اعتقد ده انسب تصرف حضرتك عملته
على الاقل عشان ميفوتكش كتير من رسومات اميرة
ربنا يبارك فيها
ايمان غيط
طبعا تصرف هايل و شجاع
و معتقدش ان لو فى اى واحد مكانك كان هيعمل كدة
ربنا يخليهوملك و يباركلك فيهم
رانيا رضا
بسم الله الرحمن الرحيم
اخي الحبيب حسام حفظك الله و حفظ لك اسرتك
و عروستك الصغيره اميره
السلام عليكم و رحمة الله و بركاته
حقيقي هذا الموضوع ذو شجون و انا اشد على يديك انك إتخذت القرار الصح من اناحيه الإجتماعيع و هو تاجيل السفر و بنا إن شاء الله يسهلها لك في الحجز الجديد
أخي حسام
الواثع انا مع شعور باكي في قولها إنها كانت عايزه تقول لأختها لماذا لم تتاخري و ترجعي مع زوجك
حقيقي هذا الشعور الرائع وهو شعور طبيعي إنساني
و لكن الذي قد لايعرفه الكثير ان هذه تضحيه من جانب ألأب لأسرة حتى يقضوا اطول فتره ممكنه بين اهلهم و في بلدهم و مع إشتداد الحر يكون الخروج للفسحه صعب و ألأصعب ان يكون ألأب مشغولا في عمله و اولاده قد انهوا دراستهم و بدا موسم إجازات الدراسه وهو ما يفهمه انه يجب ان يتفسح ومش لا زم يقعد و حيث إن هذا ألمر مرتبط بشكل او باخر بألأب هو الي معاه السياره وهو ياتي من العمل و قرف العمل و ضجيج
و غالبا ألأولاد لا تقدر هذا ألأمر كثيرا المهم عندهم ان يخرجوا و يتفسحوا حتى ولو كان ابوه متعب اوقرفان جدا
طبيعي هذه مسؤولية ألأب مما لا شك فيه فهو بسفرهم البدري يريحهم من عناء الجو الحار جدا و كذلك من عناء ألإحساس بانه مقصر في تخريجهم للفسحه
أوهكذأ ارى ألمور بموقف ألأب الذي سيعتني الكثير بعد سفرهم من التحول لحياة العزوبيه و ما ادراك ما حياة العزوبيه بعد ان كان متعودا على حيات ألأسرة السعيد وسط زوجته و اولاده
أختم هذه ضريبه يدفعها ألأب و الزوجه و ألولاد من أجل ان يتوفر لهم الحياة الكريمه
و كما يقولون
ليس كل شيئ بالساهل
و لك ولأميره و كل اسرتك عاطر النحيات
و اشد على يدك و على ايدي أسرتك التي سعدت حقا بقرارك
و كل غجازه و انت بخي
ايها القبطان لقد سرت بالطرق الصحيح مع صعوبته
اخوك
ابومحمود
بسم الله
أستاذي الفاضل
وصف حضرتك دقيق جدا
و والله بيصف حال كل بيت مصري تقريبا وقت السفر
الهدايا....الوزن
الفلوس....المصاريف
أيـــــــــــــــــــــــــوه
حاجات ياما أووووووووووووي
قبل السفر بشهر مثلا...نوضب الشنط و الشرا
و بعدين نشوف مين هيلخد إيه
و مين هيتعامل مع أيا شنطة
ماهو كل واحد فينا كان مسؤول يحفظ شنطة مثلا
وأول ما يشوفها على السير
يجري عليها ياخدها بالحضن
!!!!!!!!!!!!!!!!!!!
أهي يا ماما اهي
الشنطة أهي
هنا هنا...أنا هنا
خلي ياسر ييجي يشييييييل عننننيي
و عمري ما طلبت من محمد إنه يشيل عني حاجة مع إنه الكبير والله
كنت دايما ياعيني بدبس ياسر
و هو كان غلبان....يشيل لحد ما يتقطم ضهره
ما علينا ما علينا
إنما أنا الحقيقة مش مدركة...هل فعلا حضرتك أخدت قرار تأجيل سفر الأسرة الصغيرة ؟
ربنا يباركلكم في بعض و يسعدكم ببعض دنيا وآخرة يا رب
أنا رغيت كتير أوي النهاردة
تحياتي
منى المحمودى
الله عليك يا قبطان بجد
قرار جميل و رائع
و كلعادتك اخذتنى من اول كلمة حتى اخر كلمة مرة واحده من غير استراحة
وان شوط كده على طول بجد اسلوبك رائع اشعر فيه بحميمية و صدق عالى جدا
ربنا يخليلك الولاد ام و الولاد دائما على طول
و انتظر دائما رسائلك التى دائما تاتينا بنكهة خاصة و طعم جديد و تميز لا يضاهى من اى قلم اخر
طارق المملوك
بسم الله الرحمن الرحيم
والله يا جماعة
المفروض إننا نكون أكتر وعيا بالمسؤلية من كده
بمعنى
أنا مقدرة ظروف والدي و ضغوط شغله
أجازته 45 يوم
يعملولي إيه انا أو والدتي ال45 يوم دول في الاجازة ؟؟؟؟
بابا كان بينزلنا بدري عشان نستمتع أكتر بالأجازة
أصل دي سنة يا جماعة
سنة طويلة عريضة في الغربة
هو حبيبي كان ومازال عنده القدرة غنه يستحمل علشانا
و ده الأب
مش عارفة
بس أنا عمري ما عتبت على والدي الحقيقة
ولا على والدتي
ولا على نفسي
منى المحمودى
والله يا منى مستحمل ... هو دايما كده .. الأب يستحمل ويضحى بعمره ووقته .... والولاد مشغولين بحاجات تانية كتير .... آخرها بابا... بابا اللى ممكن ينزل بعدهم وده برضه هايحصل واللى ممكن برضه ييجى قبلهم ..... صح ولا لأ... قولى لى انت بتجيبى الجدع اللىبيضحك أوى ده ومنشكح كده منييييييييييين..... ☺
تحياتى
حسام الجمال
أخى أبو محمود... السلام عليكم ورحمة الله... أخى تعلم دور الأب جيدا وأراك قد مارسته بدقة وشفافية عظيمين ... بارك الله لك فى ذريتك الطيبة ونفع بها الأمة .
جزاك الله خيرا على جميل المشاعر .. وارجو ألا تنسانا من دعائك بظهر الغيب فى إيجاد الحجز الجديد ...
دمت أخا كريما
حسام الجمال
مش عايز أقول لكم على الكلام اللى سمعته فى الشغل النهاردة.. ماعدا بعض العقلاء اللى زى حالاتى .. ☺☺.!! بلاش فضايح ... بس والله أنا مبسوط كده.. وكفاية تشجيعكم الأكثر من رائع .... واللى يحصل يحصل... دعواتكم ألاقى حجز ...
تحياتى
حسام الجمال
إرسال تعليق