تعالوا نتكلم في المفيد...........
إزاي ننفع مصر؟؟؟؟ أيه رأيكم لو نبدأ بالكلمة الشهيرة (إعرف بلدك)، دي كلمة سمعناها كتير عايزين نطبقها بفكر متطور شوية و هو اننا نشجع السياحة الداخلية. إيه فايدة السياحة الداخلية؟ كلنا يعرف أن الأقتصادالمصري بيعتمد إلى حد كبير على السياحة و عندنا في مصر فنادق كتيييييييييير قوي، تخيلوا معايا لو حصل مشكلة في منطقة الشرق الأوسط أول حاجة بتتأثر في مصر هي السياحة و بتنزل لمعدلات قليلة قوي حوالي 4%،تخيلوا معايا الناس اللي بتشتغل في القرى السياحية مبتقبضش مرتباتها ده لو الفنادق مسرحتش الناس و مش بس كده، الشركات الخدمية اللي بتخدم القرى و الفنادق بتتأثر و هالوماجرا. لكن لو السياحة الداخلية منتعشة والناس كلها بتتجه للسياحة الداخلية بدل متسافر بره أكيد السياحة مش هاتتأثر و تقع و ده بفضل ولادها المصريين.طب وإيه الجديد ماكلنا عارفين الكلام الهكس ده، لكن ايه رأيكم نعمل حاجةجديدة!!!!!كل واحد راح فندق أو قرية سياحية يكتب عنها و يوصف جمالها و يوصف الخدمة اللي لقاها و دفع ايه في الكلام ده بحيث اننا نبقى عارفين أماكن جديدة و يبقى عندنا الفضول نزورها و أي حد يخش على الجروب ممكن يستفيد من الكلام ده و بمرور الوقت يمكن يبقى سايت سياحي ، الله أعلم.................اللي موافق على الفكرة يبعت يقول موافق و اللي مش موافق يقول وليه مش موافق
وائل صابر
4/11/2003
هناك تعليقان (٢):
انا موافقة وبشدة ولعدة اسباب منها محاربة الأعلام الأسرائيلى والإعلام المضاد للإعلامنا وكمان احنا اولى بفاوس ولادنا مش بيقولوا جحا اولى بلحم نوره
على فكرة انا باعمل كده بس مع مجموعة من المصريين المقيمين فى امريكا وباكتب بعض الحاجات اللى ممكن تخليهم يفضلوا يقضوا اجازاتهم فى مصر
jano
4/11/2003
صديقى العزيز وائل
اسمح لى ان اناديك صديقى واخى، فكلماتك فى رسالتك تنم عن حب ليس له حدود لحبيبتنا الجميلة مصر، ولذلك فنحن اخوه فى حب مصر، واصدقاء فى حب حبيبة واحده وهى اجمل بقاع الأرض، اجمل بلاد الدنيا مصرنا الحبيبة.
كلماتك رائعة، فنحن فعلا محتاجون لهذا الإتجاه فى التفكير الإيجابى فى حياتنا، نحتاج ان نبرز كل شئ جميل فى مصر، نحتاج لأن نحبها اكثر، اسمح لى ان اروى لك قصة صغيره مختصره عن عشق البلد.
فقد كنت فى رحلة لدبى منذ ثلاث شهور ومكثت فيها شهر تقريبا، ملخص هذه الرحلة، ان هذه البلد ليست اجمل مننا، ولكن من يحكمها يحبها، يعشقها، مغرم بها غراما ليس بعده غرام.
هل تعرف الفرق بين الحب والعشق والغرام؟
الحب هو معنى شمولى للحب الجميل الذى ليس له مثيل فى الدنيا، اما العشق والغرام، ففيه نوع من العمق والإدمان والإستمرارية.
وحاكم هذه البلد يعشقها فعلا، فهو يبذل فوق ما يستطيع لكى يجعل منها جنة الله فى ارضه، فليس فيها شحات ولا جوعان ولا عارى، ولا اطفال شوارع، ولا اى شئ من هذا القبيل، بالإضافة إلى انه يحاول جاهدا أن يحول الصحراء إلى جنة خضراء.
اما هنا، فهذه البلد ليس لها مثيل فى الدنيا كلها، فيها كم من الخير والمناظر الطبيعية لا حصر لها، فلدينا هنا اجمل شواطئ العالم بشهادة خبير سياحى امريكانى، على لسانه قال عن شاطئ شرم الشيخ، انها من اجمل بقاع العالم، وهى اجمل من شواطئ هاواى وكل هذه الشواطئ العالمية التى يتسابق الناس لشراء جزر فيها او قصور بها.
مشكلتنا ان من يحكمنا لا يحب هذه البلد، او دعنا نقول أنه يجهل كيف يحبها، ولا يدرى ان ما يحدث فيها يقتلها، ولا يصلح حالها، ولذلك فعلينا نحن أن نحبها قدر ما نستطيع، وفوق ما نستطيع.
ولذلك اقتراحك اروع مما تتخيل، عندك حق، فعلينا ان نكتب عن كل بقعة فى هذه الأرض الرائعة، ونقول لكل مصرى وكل عربى وكل انسان على وجه الأرض، من هى مصر، وليس ما هى مصر، لأن مصر عاقل وليست جماد، هى ام وحبيبة كل منا، ولذلك علينا ان نجمل كل منطقة نعيش فيها، او نمر عليها، وأن نعرف كل العالم بمدى الجمال فى كل شبر فيها.
واتمنى ان يقدرنا ربنا ويأتى اليوم الذى نستطيع أن نعمل فيه رحلة لكل هذه المناطق الرائعة ونصور كل هذه الأماكن ونكتب تجاربنا وندعمها بالصور التى تبرز جمالها.
ربنا يبارك فيك يا وائل، ويارب كل يوم افكار جميلة وجديده، تخلينا ناخد بايد بلدنا ونعدى بحر الظلمات اللى احنا عايشينه معاها، ويقدرنا ربنا فى تحقيق كل احلامنا فيها.
وفى النهاية لكم جميعا منى كل حب وتقدير واحترام
نجلاء محمود
6/11/2003
إرسال تعليق