ايه هى مصر
سؤال بيخطر على بالى كل ما ابص لنفسي او ابص الى شباب اليومين دول وعاوزة اسأل كل شاب وشابة وخاصة اللى اتولدوا بعد الانفتاح او فى عهدهمين هى مصر وايه هى مصر هل هى مجرد ارض وحدود ومجموعة من البشر هلى هى علم ونشيد وعنوان وجنسيةايه هى مصرقيمتها ايه فى عينيكم
لا بتسمعوا ام مصر بتحسوا كأنكم فيه حد بينادى عليكم او على شخص تعرفوههل حقا فقدنا فعلا احساسنا الحقيقى بيها من احد الاخطاء التى وقعنا فيها اننا فقدنا قوميتنا مرة نقول نحن فراعنه ومرة نقول نحن مسلمينومرة نقول نحن عربومرة نقول نحن مصريينولكن هل احنا فعلا نرتبط باى اسم من الاسماء دى اشك
jano
4/11/2003
هناك ٥ تعليقات:
يا مصر
فلاحينيك هما هما
فلاحين رمسيس وخوفو
جيش
لا عيش
ولا زمزمية
في الهجيرة تبل جوفه
المرض للموت يجره
و هو ماشي
يجر خوفه
اعمى
سالك سكه عتمه
احمد فؤاد نجم
طارق المملوك
4/7/2003
شكرا يا جانو علي مشاركتك اللي بتفتح موضوع مهم جدا ، هو
من نحن ؟؟؟؟
انا رايي اننا مصريين ، و احنا لوحدنا كده جنس و شعب و
عرق و لنا شخصيتنا القوميه المستقله ، و نظره واحده علي
كل الشعوب المجاوره لينا و احنا نتاكد ان اننا مش شبه حد
و اننا لينا كيان خاص ،
ده بخلاف اننا لنا ثقافتنا الموروثه و المستقله من قبل
العرب و من قبل ما نتكلم عربي
صحيح احنا دلوقت عرب بحكم اللغه ، لكن الاصل اننا مصريين
عرقا و دما و ثقافة و مكانا و حضاره
خالد مصطفى
4/11/2003
لاخوة الاعزاء
مصر فى رأيي خليط ونكهة خاصة جدا من اعرق و اعظم الحضارات.
مصر الفرعونية اول ما بدأت فى تشكيل شخصية هذا الشعب من تدينه و توحيده
فحضارة المصريين القدماء شكلت الشخصية المصريه فهو شعب مزارع مسالم
كريم مضياف يدين بالولاء للحاكم ولكنى ارى ان الحقبة الفرعونية هى التى
ارست الاستسلام للحاكم ولم يذكر التاريخ ثورة واحدة فى عهد الفراعنة.
صفةاخرى اكتسبتها الشخصية المصرية من هذا العهد وهو ان كل المشروعات
الضخمة من اهرامات ومعابد ومقابر لم يتم تشييدها الا بالسخرة واعتقد
ايضا ان افتتاح كل هذه المشروعات كان فى شهر اكتوبر.
ايضا دخول المسيحية مصر واحتضانها لهذا الدين اثبتت ان هذا الشعب يحب
الله ومتدين بطبعه وقد اضافت الشخصية المصرية الكثير لهذا الدين وكلنا
يذكر قيمة وثقل كنيسة الاسكندرية على مر العصور منذ مهد هذا الدين. كذلك
المذهب الارثوذوكسى الذى ينفرد به الاقباط فى مصر عن غيرهم حتى ولو تشابه
المسمى فى دول اخرى.
اكملت فيه الحضارة الاسلامية هذه الصفات فى الشخصية المصرية من كرم وتدين
و التى يعتمد عليها الاسلام تماما ويكفى ان الاسلام قد دخل مصر بدون قتال
من النوع الذى فتحت به بلاد الشام و قبائل الجزيرة العربية. وكانت مصر
هى الحصن الحصين للاعتدال الاسلامى على مر العصور وقائدة الامة الاسلامية منذ
بداية التفكك والطمع الصليبى والتتارى على الامة الاسلامية.
من هنا اصدقائى نرى ان الشخصية المصرية متفردة الصفات و هى خليط من كل
تلك الحضارات التى مرت بها فكلنا نعرف كيف اصبح صلاح الدين بطلا من هنا
من مصر وكذلك دولة الماليك والتى كان الوطن العربى اجمعه يمتلك هؤلاء
المماليك ولكن لم تظهر لهم انجازات ولا شخصية الا بما اكتسبوه هنا من مصر.
نهايةً اصدقائى مصر هى رمسيس واحمس وحتشبسوت وكليوباترا
وهى ايضا صلاح الدين و قطز وبيبرس واحمد بن طولون و محمد على
وهى سعد زغلول ومصطفى كامل كذلك مصر حسن ارابيسك وابو سويلم فى فيلم
الارض وهى الفلاح الفصيح فى عهد الفراعنة.
طارق المملوك
4/11/2003
يا طارق مصر هى الوطن
هى العرض والشرف
هى الأم والولد
هى العيلة والأهل
مصر هى الحب
هى الهواء اللى بنتنفسه مهما كانت مشاكلنا فيها بس هى حبنا
انا مصر بالنسبة لى هى الحب الأول والأخير ولو بنتقد حاجة فيها فده لأنى نفسي اشوف محبوبي احسن حاجة فى الدنيا
مصر هى الأنتماء الحقيقي وما ينعفش اى انتماء غير ليها
jano
4/11/2003
اصدقائى الاعزاء وجدت قصيده جميلة جدا للفاجومى منتهى الاحساس العالى بمصر ومن اجمل من وصف مصر
اليكم قصيدته آدى مصر.
ادى مصر
مصر الطحين و الفلاحين و البنايين و السقايين
و الصيادين و المنشدين
و الصنايعيه
مصر النخيل و النيل و الصبر في المواويل و الملاغيه
مصر السمار و العمار
و ابن إياس و الجبرتي
و عجايب الآثار
و حواديت الشاطر حسن و امنا الغوله
و سكه السلامه
و سكه الندامه
و سكه اللى يروح ما يرجعشي
و تعالى يا شاطر نروح القناطر
و البيض الملون و شم النسيم
و مصر النديم
و هوجه عرابي و حرب الطوابي
في وجه الخديو عميل لنجليز
و مصر الملانه و حب العزيز
مصر الكنايس و مصر الجوامع
مصر المزارع و مصر المصانع
و خان الخليلي
و درب الغوازي و سيدنا الحسين
و فرعون و موسى و بركه قارون
مصر العديد و السكه الحديد
و مصطفى كامل و محمد فريد
مصر الموالد و شيلاه يا طاهره
يا ست ام هاشم
يا جبر الخواطر
يا ماري يا جرجس
يا سيدي ابراهيم
تناولوا اللي عايز
و تشفوا السقيم
مدد ثم نظره
في قلب المقام
و نخرج قوام
و نلعب يا حاوي
الطبيب المداوي
و ابو رجل مسلوخه
و الست اللى كلت دراع جوزها
في جنينه الحيوانات
الكلب ابو سنان دهب
و سبحان من وهب
مصر الكتاتب و المدارس
و التلامذه و الثوره و الأناشيد
السجن و السجان
و العشاق المعاميد
مصر "الولاد السمر خضر العمر في عموم الحواري"
"مصر البنات المخطوبين في المهد لسرير الجواري"مصر الصيام
و السحور
مصر السواحل و البحور
مصر المظالم و البلاوي
و الباش اغا التركي
و ادهم الشرقاوي
مصر الحديثة و رفاعه رافع الطهطاوي
مصر العلوم و الفراعنه
و الطب و التنجيم
مصر محمد علي الفاتح
و ابنه ابراهيم العظيم
مصر الجناينيه و الشيالين
و بياعين العرقسوس و اللمون البنزهير
و خير اللهم اجعله خير
مصر الحضر و الريف
و ازهر العلم الشريف
و سليمان الحلبي
و جمال الدين الأفغاني
و الأمام محمد عبده نعم الأمام
عليه البراوه و عليه السلام
مصر الصعايده و الرشايه و البحاروه
و السواحليه
مصر النهود الشهود
و الرموش السود
و القدود المعجبانيه
مصر الغيطان
و جمال حدان
و طه حسين و لويس عوض و العقاد
و فؤاد حداد
و نجيب محفوظ
و صلاح جاهين
و البيانولا
و عم بيرم و البراقع و اللبده و الجلابيه
مصر النجوع و الكفور و البلاد
و طلعت باشا حرب زعيم لا قتصاد
مصر الفنون اللي جاءت
و فاقت جميع الظنون
مراسح و سما و نغم و روايات
الشيخ سيد درويش البحر
و بديع الزمان ابن خيري
و عبده الحامولي و يلامه حجازي
و نجيب الريحاني
و عبد الوهاب حبيب الحكومه و الست ثومه
اميره بلاد العرب في الطرب و الآهات
و مصر اللي كانت و مصر اللي جات
مصر المداين و الزقاق
مصر المشلتت و الرقاق
و مختار زمانه و نهضه بهيه
اللي هي الحكايه و هي القضيه
ما تقدرش ترصد جميع المعالم
ما تقدرش تفهم جميع اللغات
خلاصه الكلام انا مستهام و مغرم صبابه و ميت غرام و سهران تملي و مش عايز انام
و كل انشغالي في جوف الليالي
بادور عليه في عالم زحام
***
احمد فؤاد نجم
طارق المملوك
6/11/2003
إرسال تعليق